USA
sa mga paagi aron mahimong eksperto sa pagdaginot sa imong kuwarta ang
pagkunhod sa imong magasto sa mga balayronon. Dili lang nimo maamgohan, kon
dili susihon, nga ang mga balayronon nahimo nang higanteng alimatok nga
misupsop sa halos tanang nimong kinitaan. Ang pagbaton og talaan o rekord sa
mga nagasto maghatag og kahigayonan sa pagsusi kon kini mikutkot na ba sa imong
bulsa. Niini, makaaplay kag mga paagi unsaon nga makunhoran kini apan dili masakripisyo
ang mahinungdanong panginahanglan sa pagpakabuhi matag adlaw.
Unsaon nga
makadaginot sa balayronon sa kuryente
Ang
balayronon sa kuryente maoy nag-una sa talaan kay halos nagdepende ang atong
kinabuhi sa mga aplayanses nga gipadagan sa kuryente. Migamit kitag daghang
aplayanses sa halos tanang oras sa panimalay. Kining mga butanga mokonsumo og
daghang enerhiya nga molutaw sa balayronon sa kuryente matag buwan.
Sa
padayon nga pagtaas sa balayronon sa kuryente, angay lang nga mangitag paagi
nga makunhoran ang paggamit sa kuryente. Ang mga yano apan nalingatan nga energy saving tips makatabang og dako sa
pagpaubos sa paggamit sa kuryente ilabi
na diha sa matag panimalay. Magamit nimo ang pormula nga nasulayan nang epektibo
sa daghang panahon ug uban pang mga ideya.
Aniay
yanong mga paagi nga imong masulayan aron episente ang paggamit ug makadaginot
usab sa balayronon sa kuryente.
·
Gamit
sa bag-ong compact fluorescent light (CFLs)
bulbs kaysa tradisyonal nga mga bombilya. Ang CFLs mahimong molungtad og
lima ka pilo kaysa incandescent light
bulbs ug mokonsumo og mas diyotay nga enerhiya. Sa paggamit sa CFLs, mahimo
kang makamenos og 10 ngadto sa 15 porsento sa imong balayronon sa kuryente matag
bulan.
·
Seguroon
nga tangtangon ang gisaksak nga kutay sa kuryente sa aplayanses ilabi na
kadtong dunay stand-by mode function.
Kay ang pagpawong lang sa power button
diha sa remote control o sa
aplayanses mismo dili paigo tungod kay ang aplayanses padayon gihapong
mokonsumo og kuryente samtang naa sa stand-by
mode.
·
Sa
gabii, pawngon ang cooling control system
sa refrigerator apan dili tangtangon
ang kutay sa kuryente sa power source niini.
Kini makamenos usab og 10 porsento sa konsumo sa kuryente.
·
Ablihan
lang ang refrigerator kon
gikinahanglan.
·
Kon
adlawan, mas maayo nga ablihan lang ang bentana kaysa pasigaon ang mga suga.
·
Pagngon
ang mga suga matag higayon nga mogawas sa kuwarto.
·
Mamalantsa
na lang og kausa sa usa ka semana.
Unsaon nga
makadaginot og kuwarta sa imong paggroseri
Daghang
mga paagi nga makunhoran ang balayronon sa paggroseri. Apan kini wala magpasabot
nga ikompromiso ang kalidad sa mga produkto nga paliton. Hinuon, maoy buhaton
ang paggamit sa mga teknik nga makatabang nga makadaginot sa imong
pagpanggroseri.
Mga
paagi nga makadaginot kon maggroseri:
·
Sa
dili pa moadto sa groseri, ilista ang mahinungdanong paliton.
·
Maggroseri
nga mag-inusara. Kon dunay kauban, mahimong madugangan ang gasto kay mahimo man
usab silang mamunit sa ilang magustoan.
·
Maggroserig
sayo. Niini, dali ka rang makapili sa imong paliton nga naa sa imong listahan
ug diyotay ra sab ang magasto.
·
Likayan
ang paggroseri kon gutom. Kay seguradong daghan ang mahimong paliton.
·
Dili
maggroseri kon gikapoy. Kay makapalit kag daghang tam-ison nga pagkaon.
·
Magdala
og calculator. Niini, mahimo nimong
makompyut kon ang presyo sa kada usa ka produkto diha sa usa ka kahon mas
barato kaysa pagpalit og usa lang sa samang produkto.
·
Susiha
ang imong resibo. Kay bisan og unsa pa ka mabinantayon ang mga kahera o
tigbantay sa groseri, masayop gihapon.
