ANG arc welding gihulagway sa pinulongang English sa ingon niini: “Arc is a luminous glow which results from the passing of an electric current between two incandescent electrodes.”

Kining maong trabaho, kon dili labing dako o labing taas og suweldo, usa na kini sa nagsunod niana, bisan asang suok sa kalibotan. Kanunay kining in-demand sa dagkong mga kompaniya sama sa mga oil refinery, pipelines ug mga tulay ug building constructions nga gigamitan og dagkong I beams sama sa PNB sa Escolta, Manila o kaha sa Aguinaldo building sa Ayala Avenue sa Makati. Kining maong mga bilding, gitrabaho sa AG&P sa Manila nga migamit og daghang welder.

Kon ang usa ka lalaki gustong mo-abroad, labi na kon wala siyay laing nakat-onan nga trabaho, mas maayo kaniya nga magtuon una unsaon pag-welding. Ang welding dali ra kaayong makat-onan kon itandi sa ubang trabaho ug dali ra usab makakita og trabaho ang usa ka maayong welder.

Kon dunay maayong welder nga makatudlo sa tanang paagi sa pag-welding, imo kining makat-onan sulod lang sa usa ka bulan. Bisan asa ka sa kalibotan, dili bentahaan ang suweldo sa usa ka maayong welder labi na sa Amerika. Ang suweldo sa welder sa mga oil drilling rig sa Amerika ug Canada, $80-$90 per hour. Ug sa mga oil refinery, labing taas ang suweldo sa maayong all-around pipe welder.

Nasayod ko niini kay ako mismo, dili sa pagdayeg sa kaugalingon, una nahimong writer, usa na ka maayong pipe welder sa nagkalainlaing oil refinery sa Guam, Saudi Arabia, Iran, Kuwait, Libra, Africa, Venezuela ug uban pang mga nasod.

Mibiya lang ko sa mga oil refinery sa dihang may maayong offer sa mga oil drilling company. Sa dihang nahimong writer, mi-retire ko sa akong trabaho ug nag-focus na lang sa pagsulat. Apan gikuha gihapon akong welding instructor sa usa ka non-formal education nga gipahigayon sa New Era University sa Maxilom St., Siyudad sa Sugbo. Nakapa-graduate kog kapin sa 80 ka tinun-an sa welding nga ang uban niini atua na karon magtrabaho sa gawas sa nasod.

Ang akong diploma sa pagka welding instructor nakuha nako didto sa Department of the Navy, United States of America sa San Diego, California.

Alang ning tagsulat, mas maayong ang gustong makat-on sa welding mokuha og maayong instructor nga motudlo kaniya sa one-on-one basis kaysa moeskuyla siya nga dugay kaayo siyang makakat-on ug kon makat-on man, diyotay lang ang makat-onan kay wala ikatudlo kaniya ang tanan. Ug kon mahitungod sa certification, dili kaayo kana problema kay daghan ang makahatag, nag-una niana ang Technical Education and Skills Development Authority kun TESDA.

Source: Gally Sayson, Bisaya magazine

ANG Young Farmers Program (YFP) maoy solusyon sa nagkadiyotay nga mga Pilipino nga misalga sa pagnegosyo sa agrikultura ug pangisda pinaagi sa pag-agni sa mga gradwado sa kursong agrikultura ug pangisda nga sudlon ang kalibotan sa pagka entreprenor aron makabukas og ganghaan ngadto sa lig-ong modernisasyon.

Naugba gikan sa panghunahuna ni Senador Ramon Magsaysay, ang tsirman sa Congressional Oversight Committee on Agricultural and Fisheries Modernization, ang YFP mag-aghat sa batan-ong gradwado sa agrikultura ug pangisda sa kolehiyo ug unibersidad nga gipanag-iya sa estado sa Pilipinas nga mosulod sa pagnegosyo. Ang YFP mogiya kanila aron mahimong entreprenor ug kabahin sa pundasyon sa pag-ugmad sa nasod. Kining maong programa magbukas sa dalan aron makat-on ug maugmad ang kahibalo sa pagnegosyo sa bag-ong mga gradwado o madugangan ang kahibalo sa mga nakasugod na sa pagnegosyo.
Ubos ning maong programa, ang kagamhanan andam motabang sa mga entreprenor nga makakuha og pahulam nga salapi nga nagrepresentar sa 60 porsento sa kinatibuk-ang kapital nga gikinahanglan sa negosyong gustong sudlan. Ang 25 porsento sa kapital nga gikinahanglan, ihatag sa kagamhanan silbing grant sa maong programa nga dili na angay pang bayran sa benepisyaryo. Samtang ang nahibiling 15 porsento angay andamon sa benepisyaryo o mga benepisyaryo isip iya o ilang share o equity.

Ang mga aplikante mahimong lalaki o babaye, edad 21-39; gradwado sa agrikultura o bisan unsa nga kurso apan kasamtangang nagnegosyo; physically, mentally and emotionally fit nga moapil sa mga aktibidad ug programa; dili paryente sa mag-aprobar (hangtod sa second degree of affinity and consanguinity); good moral character ug andam magpaubos sa pagbansay-bansay nga dumalahon sa Department of Agriculture, ug ubang kalambigit nga ahensiya sama sa QUEDANCOR ug mga tunghaan nga akreditado sa CHED o TESDA.

Ang interesadong indibidwal o grupo mahimong mag-ugba sa ilang project proposal sa sudlang negosyo sama sa coir decorticating production, beekeeping, duck raising, broiler production, poultry egg production, tilapia production, mudcrab production, cattle fattening, hog fattening, swine production, goat production, papaya production, oyster mushroom cultivation and banana mushroom spawn production, chayote production, vegetable seedling production, mango production, Arabica coffee processing and export quality peanut production, sa paghingalan og pipila.

Kon mahuman ang project proposal, maghimo og duha ka kopya. Ang usa iduso ngadto kang Corie Villarino sa National Agricultural and Fishery Council, usa ka ahensiya sa kagamhanan nga ubos sa Department of Agriculture. Ug ang laing kopya iduso sa duol nga buhatan sa QUEDANCOR sa inyong dapit.

Ang QUEDANCOR magpili og agri-based project proposal nga ilang pundohan gikan sa Php 50,000 ngadto sa Php 300,000. Gawas sa suportang kapital, ang mapili nga benepisyaryo hatagan og dakong suporta sa YFP uban na ang dugang teknikal nga kaalam ug luna nga gamiton alang sa sudlang negosyo, aron ang batan-ong gradwado sa agrikultura ug pangisda o ang nagsugod-sugod sa pagnegosyo mahimong malamposon nga agribusinessmen sa umaabot.

Sukad sa paglusad ning maong programa pipila ka tuig na ang minglabay, ang mga benepisyaryo sa YFP nakaani na sa bunga sa ilang kahago ug paningkamot sama nila ni Brian Quirol sa Baybay, Leyte, nagmintinar og nursery ug namaligya og itanomayng semilya sa prutas; David Dumlao, namuhi og itik sa Isabela; Mikhael Chavez, nananom og kapayas sa Oriental Mindoro ug karon regular nga nagsuplay sa mga supermarket sa Metro Manila; ug si Raffy Espiritu, nananom og mani sa La Union. Ang mga benepisyaryo nga nahisgotan sa unahan, nagmalamposon ug mikitag dako sa gisudlan nilang negosyo tungod sa ilang kakugi ug dedikasyon.

Kon gusto kang mosunod sa mga lakang ning malamposong mga agribusinessman, apil na sa YFP!

Alang sa dugang kasayoran, kontaka: Congressional Oversight Committee on Agriculture and Fisheries Modernization c/o LarryVillanueva, YFP National Coordinator, Room 515 Senate of the Philippines, GSIS Building, Financial Center, Roxas Blvd., Pasay City; Tel: (02) 552-6601 locals 5512, 5513, 5501; Fax: (02) 551-3253; Email: cocafm@bahn.net o yfp_larry@yahoo.com. O ang National Agricultural and Fishery Council c/o Corie Villarino, 3/F Apacible Hall, D.A. Building, Elliptical Road, Diliman, Quezon City; Tel: (02) 926-2241, 928-8741 loc. 2605; Telefax: (02) 920-4092; Website: www.nafc.ph.