Unsaon nga Mokitag Dolyar nga Dili na Manarbaho sa Gawas sa Nasod? (How To Earn Dollars Without Working Abroad?)

Ni ELEAZAR TUTOR ACAMPADO

MATAG adlaw liboan ka Pilipino ang mogawas sa nasod aron magpaulipon sa mga langyaw mokita lang sa ginapangandoyng dolyar. Adunay mga doktor, nars, maestra, enhinyero, seaman, ingon man mga mason, welder, electrician, drayber, kosinero, waiter ug uban pa. Apan may mga Pilipino sad nga mokitag dolyar nga dili na manarbaho sa gawas sa nasod. Nahimo kini ni Vincent Isles (administrator sa Isles Tech, EduPhil ug uban pa), ni Mike Ligalig (administrator sa Tubag Bohol, usa ka forum nga gibuhat alang sa mga Bol-anon), ug ning tagsulat.

Tungod sa pagsulbong sa teknolohiya sa internet, misulbong usab ang oportunidad sa pagpangita og kuwarta bisan anaa ka lang sa sulod sa imong panimalay o sa internet café. Basta anaay kompyuter ug koneksiyon sa internet, nakaseguro ko nga mokita kag dolyar labi na kon nasayod kag unsaon.

Pipila sa epektibong kahinguhaan og dolyar mao ang pag-apil-apil sa mga paid survey, pagsulod isip virtual assistant, pagpanguha og translation services, pagpamaligya sa kaugalingong produkto diha sa Ebay ingon man usab diha sa Multiply, pagpanulat og artikulo nga ipatik sa mga website, pagsangyaw sa mga produkto sa uban kun affiliate marketing, ug pag-ugmad og kaugalingong blog (tipiganan sa mga alinghuna, ideya, kasinatian, hulagway, musika, balita, ubp.)

Sa akong tan-aw, ang blogging ang usa sa labing maayong paagi nga mokitag dolyar ingon nga usa ka online business, nga labi pang epektibo kon ikombinasyon sa affiliate marketing. Gamay ra ang gikinahanglan niining kapital aron makasugod, makadani og magbabasa ug unya makat-on unsaon sa pag-monetize sa blog nga maghatag og desenteng kita nga padayong moabot bisan og magtrabaho lang og duha ka oras sa usa ka adlaw. Pipila sa sikat ug kusog mokita nga blogs karon nga akong ginabasa mao ang ProBlogger ni Darren Rowse, Entrepreneurs-Journey ni Yaro Starak, JohnChow ni John Chow, ZacJohnson ni Zac Johnson, YugaTech ni Abe Olandres, Macuha ni Marhgil Macuha, sa paghingalan og pipila.

Pag-ugmad og Blog
Sa mga gustong mosulod sa pag-blogging, dunay daghang paagi sa pag-set up og blog. Mahimong mogamit og Wordpress, Blogger ug uban pang libreng mga site nga mag-host sa blog. Apan ang labing maayo mao ang pag-set up og kaugalingong blog nga magdala sa kaugalingong domain name, pananglitan www.mb.com.ph sa mantalaang Manila Bulletin, aron dunay kompletong kontrol sa pagdumala sa blog kun seryoso gyod nga mokitag dolyar gikan sa pag-blogging. Mogasto ka lag labing menos $10 matag tuig sa domain name ug $7 sa hosting server.

Sa higayon nga mamontar na ang imong balayan, mamili kag template ug layout nga mahiayon niini. Dunay daghang libre nga magamit nga theme alang sa nagkadaiyang platform labi na sa Wordpress ug Blogger. Kon may ikasarang, mahimo usab nga mopalit og premium themes.

Apan ang labing mahinungdanong pangutana ani kon unsay sulaton ug ipatik diha sa imong blog. Dunay mga tawo nga nag-blog bahin sa ilang kinabuhi, dunay bahin sa ilang trabaho, dunay bahin sa ilang hobbies, ang uban naghisgot sa celebrities, ug duna say bahin sa mga produkto.

Karon magsugod ka na sa pagsulat sa imong blog posts. Kon imong makita ang pipila ka blog sa internet, mabantayan nimo nga ang gitas-on sa ilang gipangsulat nagkadaiya. May mingsulat og usa ngadto sa duha ka parapo. Duna say misulat og artikulo nga may 400 ngadto sa 500 ka pulong. Apan duna say misulat og mas taas pa nga artikulo. Kay lagi wala may tinuod nga balaod kon blogging na ang hisgotan.

Human mag-post og artikulo sa blog, usa ka dakong hagit sa blogger ang pag-atrak og magbabasa. Dinhi magsugod ang kuti nga pagpangita og magbabasa pinaagi sa pagsangyaw sa imong blog diha sa cyberspace sa mga social bookmarking site sama sa Twitter ug Facebook, sa social media site sama sa Digg ug Reddit, sa forum, sa ubang mga blog ilabi na sa susama o kalambigit sa imong blog, sa email, sa article directories ug blog directories.

Apan ang tanan nimong kahago makawang kon dili nimo kini ma-monetize. Mas labing maayo nga mokita kag kuwarta gikan sa mga mibisita sa imong blog. Dunay daghang paagi nga mokitag dolyar. Usa na niini ang Google Adsense. Libre ka nga makabukas og account niini aron makakuha og ads code nga ikapahimutang sa mga pahina sa balayan aron makaatrak og ads gikan sa Google Adwords Network. CPC kun Cost Per Click ang nag-una nilang serbisyo diin mokita kag komisyon sa matag click sa anunsiyo nga migawas sa imong balayan.

Mahimo sad mokita sa pagsulat og mga artikulo sa espesipikong mga suheto nga gisitar sa Pay Per Post ug Review Me nga nagrebyo sa mga produkto ug website. Sa laing paagi, mahimo sab nga magrebyo ug magrekomendar og mga produkto sa ubang tawo pinaagi sa affiliate links nga ipahimutang sa blog posts. Mokita kag komisyon sa matag produkto nga mahalin.

Sahi sa mga mantalaan, makatanyag sab og espasyo alang sa mga anunsiyo diha sa blog diin makasitar kag pilay imong ipabayad.

Sa higayon nga maestablisar na ang imong balayan, daghan na ang magbisitahan ug mikita na, mahimo nimo kining ibaligya sa napulo ka pilo sa binulan niining kita. Ug unya mahimo ka na sab nga magsugod og bag-ong proyekto.

Akong Kasinatian Nga Mikitag Dolyar
Naikag ko sa pagkat-on unsaon sa pag-blogging dihang natan-aw nako sa programang Mel & Joey si Abe Olandres nga naghisgot nga mikita siyag sobra sa $5,000 sa pag-ugmad niya sa YugaTech, usa ka technews site. Ug bisan daginoton ang akong pasilidad sa English language ug kaalam sa internet, nangaresgar gyod ko nga makatukod og blog aron makasunod sa tunob ni YugaTech (online name ni Abe). Nag-research ko sa internet sa mga artikulo nga makatudlo kanako sa mga yano ug ekspertong tamdanan sa pag-blogging. Ug sa paggiya ni Higaladagang ug Kompare Mike Ligalig nasugdan gyod nako ang akong unang blog ginamit ang Blogger blogging platform.

Tungod kay mahiligon kog basa-basa bahin sa pagnegosyo, nakahunahuna ko pag-ugmad og balayan nga maoy mahimong depositohanan sa mga giya ug balita bahin sa pagnegosyo ug malamposong nanagnegosyo nga akong mabasa ug makutlo sa mga mantalaan, magasin ug bisan sa internet. Dinhi natukod ang Entrepinoy Bank (Make Money Bank for Best Ways to Make Money) nga ang kanhi URL address entrebank.blogspot.com. Sa dihang napalit nako ang domain name nga entrebankph.com sa GoDaddy, gi-trasfer nako ang Entrepinoy Bank gamit ang bag-ong domain name ubos sa Wordpress blogging platform sa bag-ong hosting provider.

Sa unang upat ka bulan, lipay na kaayo ko nga dunay mibisita nga 30-50 matag adlaw ug mokitag $4-8 matag bulan gikan sa Google Adsense. Apan dili pa gyod ko kontento. Nangalap kog dugang mga teknik ug giya. Hangtod nga nabasa nako ang mga ebook kun electronic book nga nagtuki sa how to make money online sama sa 31 Days to Build a Better Blog ni Darren Rowse nga napalit nakog $19.75, Blog Profits Blueprint ni Yaro Starak ug Make Money Online with JohnChow ni John Chow nga parehong libreng ma-download sa ilang balayan.

Naaplay nako ang akong nakat-onan gikan sa maong mga ebook. Ug epektibo kaayo kay pagtangkod sa unom ka bulan sa Entrepinoy Bank, hinay-hinayng mingdaghan ang mingduaw niini ug hinay-hinay sab nga midako ang kita hangtod nga nakapunpon kog $102.19 nianang pagka Abril 2009. Maoy polisiya sa Adsense nga dili ipadala ang komisyon sa Adsense kon dili moabot og $100 ang kita sa Adsense account, ug nga kini ipadala pagkasunod bulan na. Mao nga nakobra nako ang unang kita nga dolyar diha sa internet niana nang Mayo 26, 2009 pinaagi sa Western Union Quick Pay.

Una kong mikitag sobra sa $100 niana nang pagka Hulyo. Nakapunpon ko niadto og $103.98 sa Adsense sa tibuok bulan. Sukad adto, mosobra na sa $100 ang akong kita matag bulan nga nagpadayon hangtod karon. Gani, matag kataposan sa bulan na sab kong magdawatan sa bugti sa akong paningkamot sa pag-ugmad sa Entrepinoy Bank. Ug sa pagsulat niini, Hulyo 20, nakapunpon na kog $289.

Gawas sa Google Adsense, mikita na sab ko sa pagsulat og artikulo nga dili mokubos sa 300 ka pulong nga ako ra usab nga gi-post sa blog. Dunay mibayad nakog $6, $10, $12, $25 ug ang labing dako mao ang $70 gikan sa usa ka banking website sa Amerika. Mikita na sab ko gikan sa direct advertising sa usa ka financial services company sa United Kingdom nga mibayad nakog $200 sulod sa usa ka tuig nga anunsiyo sa ilang serbisyo. Ang bayad niini nakuha nako pinaagi sa Paypal nga mao usay akong gigamit sa pagbayad sa domain name ug hosting sa blog, ug sa Smart Broadband nga maoy internet service provider sa desktop computer nga akong gigamit sa balay.

Gawas sa monetary reward, duna say edukasyonal nga benepisyo ang akong balayan. Nakuha kong blog partner sa Learning Curve, Inc. ug nakatambong nga libre sa gipahigayon nilang duha ka adlaw nga Money Summit and Wealth Expo sa Carlos P. Romulo Auditoriom, RCBC Plaza Makati niadtong Hulyo 1 ug 2. Naimbitar sab ko sa BrandSpeakAsia alang sa press conference sa paglusad nila sa BPI Globe Banko nga gipahigayon sa BPI head office sa Dakbayan sa Makati.

Bisan dunay mga kahuyangan ug kakulangan, apan gihinay-hinayan nakog korehir ang akong balayan. Sa tibuok kong kinabuhi, ako kining mahalon, ampingan ug palamboon ingon nga usa ka tinuod nga negosyo. Kay sa dagan sa panahon, napanglantawan man gyod nako nga mas daghan pa ang moabot nga benepisyo niining naugmad kong online business. Maoy tumong nako karon nga mokitag $1,000 sa dili pa matapos ang tuig. Ug kini dili imposible.

Kon nahimo ni Vincent Isles, ni Mike Ligalig ug nako nga mokitag dolyar nga dili manarbaho sa gawas sa nasod, way rason nga dili usab nimo kini mahimo. Ang unang lakang ray lisod.

Kini alang sa imong kalamposan ug pinansiyal nga kagawasan!

(Alang sa mga pangutana, email sa tagsulat sa entrepinoybank@gmail.com.)