Maayong Mga Butang sa Pagsaulog Nato sa Pasko

Maayong Mga Butang sa Pagsaulog Nato sa Pasko
Ni ELEAZAR TUTOR ACAMPADO


YUNIK ug walay ikatandi ang pagsaulog nato sa Pasko. Ginasaulog man god nato ang labing taas nga Pasko sa tibuok kalibotan, gikan sa Disyembre 16 sa unang adlaw sa misa de gallo ug matapos sa pista sa Tulo ka Hari sa Enero 6. Gani, mahimo na man kining makasulod sa Guinness Book of World Records alang sa yunik ug labing taas nga panahon sa pagpangandam ug pagsaulog sa Pasko.

Maoy atong naandan ang pagsaulog sa Pasko nga puno sa kasadya ug kalipay. Busa kini ang labing ginaatngan nga okasyon sa tanang panahon, ang paboritong okasyon sa halos 94 ka milyong Pilipino. Lupig niini ang pagsaulog nato sa pista. Kay tiaw mo na nga sa pagtungtong pa lang sa Septiyembre, daghan na ang mangandam sa pag-abot ning halandomong panahon sa tuig. Mabati na man gani nato ang Paskohanong mga awit. Hinuon, ang uban sa paghitangka na sa Nobiyembre magsugod ang preparasyon sa pagpahimutang og Christmas decors sama sa Christmas tree, belen, parol, ubp.

Sa paghinangat sa Adlaw sa Pasko, mabatyagan nato ang festive mood sa bisan asang suok sa Pilipinas. Kay lagi ang pagsaulog niini daghag ikadulot nga maayong butang sa atong kinabuhi.

Malimtan natong mga Pilipino ang tanang kalamidad ug mga masakit nga kasinatian alang ug tungod sa espiritu sa Pasko. Malimtan nato ang mga problemang ikahibalag matag adlaw. Kini ang panahon nga ang dili tinuod nga managhigala ug labing higpit nga kaaway magkatapok alang sa usa ka rason: ang pagsaulog sa pagkatawo ni Hesus nga atong Manunubos.

Ang taas nga panahon sa pagsaulog sa Pasko naghatag og oportunidad natong mga Pilipino nga magkahiusa uban sa atong pamilya, paryente, higala ug bag-ong nakaila aron labi pang maugmad ug mabug-os sa kalig-on ang relasyon sa panagdait sa usag usa. Mag-uban ning panahona ang pamilya sa Noche Buena, sa pag-ampo ug pagbinayloay og mga regalo.

Kini sad ang panahon alang sa reyunyon. Diin ang panagdait nagpahigayon kanato nga saulogon og maayo ang kinabuhi nga mora ba og anaa nato ang tanang butang sa kalibotan. Magbaha ang walay kataposang kalipay.

Panahon usab kini nga matilawan ang lamian nga mga pagkaon sama sa bibingka, puto, budbod, suman ug uban pa. Hinuon, bisan og duna kitay mapalit nga ingon niini sa laing mga adlaw, lahi gyod ang mga pagkaon nga ibayang panahon sa Pasko. Makunhoran lagi ang insidente sa kagutom niining panahona.

Usa sa labing maayong butang ang pagpakita sa panagdait ug paghigugma sa isigkatawo. Ang pamilya sa kanunay makabatyag nga kompleto ang ilang Pasko kay nahiusa man usab sila sa pagsaulog sa espirituwal nga kasaulogan sa Pasko.

Sa pagsaulog sa Pasko, mabatyagan nato ang presensiya sa tinuod nga gugma ug sa init nga pagbati gikan sa pamilya, paryente, higala, ubp. Usa kini ka espesyal nga panahon sa pagpakita sa atong kalipay pinaagi sa paghatag og pagdawat og mga grasya. Ang pagpahat ngadto sa uban sa mga grasya nga nadawat ug pagtabang ngadto sa mga kabos ug alaot sa katilingban.

Bisan pa og anaa kita sa lisod nga sitwasyon, dili gyod nato makalimtan ang tinuod nga kahulogan sa Pasko. Higugmaon nato ang atong isigkatawo ug handomon ang maayong binuhatan ni Hesus Kristo. Sa pagsaulog nato sa pagkatawo ni Hesus, matag Pasko gipakita nato ang gugma ngadto sa mga tawo nga anaa sa atong palibot. Gipabatyag nato kanila nga sila mahinungdanon sa atong kinabuhi. Gidawat nato si Hesus ug gitugtan nga mosulod sa atong kinabuhi aron magkahiusa kita sa gugma ug pagtuo.

Palaran kitang mga Pilipino nga libre ang pagsaulog nato sa Pasko. Dili sama sa ubang mga nasod ilabi na ang dili Kristiyano nga usa na ka dakong krimen bisan na lang ang pagkanta og Paskohanong awit.

Kanatong tanan, Malipayong Pagsaulog sa Pasko!