Panlantaw sa Pagsugat sa Bag-ong Tuig

Panlantaw sa Pagsugat sa Bag-ong Tuig
Ni ELEAZAR TUTOR ACAMPADO


KOMUN na ang pagsambog sa relihiyon ug patuo-tuo sa pagsaulog nato sa pagsugat sa unang adlaw sa Bag-ong Tuig. Magbanha kita aron mahinginlan ang mga daotan. Magsul-ob og sapot nga polka dot aron dili maglisod sa panalapi. Pasigaon ang tanang suga aron magmahayag ang kaugmaon sa tuig. Magbayang ug lamiang mga pagkaon ug mokaon sa 12 ka lignging prutas aron buhong sa pagkaon ang tibuok tuig. Molukso aron motaas nga ipahigayon sa unang segundo sa tuig. Ablihan ang tanang pultahan ug bentana aron pasudlon ang suwerte ug maayong enerhiya sa kalibotan. Mobasa sa Bibliya ug motambong sa misa, ubp.

Sa pagsugat sa Bag-ong Tuig, naapil usab sa atong mga ritwal ang paghinulsol ug pagbag-o. Hugot kitang nagtuo nga ang bag-ong tuig magdala og bag-ong paglaom, bisan pag natabonan sa mga kapaksayan. Apan kini magpahinumdom usab kanato sa panahon sa pagbuhat ug ang padulngan sa tanang binuhat nga may kinabuhi.

Ang Bag-ong Tuig labaw pa kay sa yanong panukdanan sa panahon. Kini usa ka oportunidad aron pagsuhid sa ngangagi, molantaw sa unahan ug sa tanang moabot pa, ug unya mobalik sa labing mahinungdanong gimbuhaton sa kasamtangan panahon.

Sa katilingban nga nabilanggo sa orasan, kritikal ang daklit nga paghinuktok. Magtugot kini kanato pagkat-on sa atong mga sayop, sa atong mga hustong nabuhat, ingon man sa naandang ginahimo. Kini ang hinungdan nganong nagahimo kita og resolusyon sa Bag-ong Tuig, o mga panaad nga ato lang usab nga pakyason.

Bisan unsa kadaghan sa atong gipangbayang nga pagkaon diha sa lamesa alang sa media noche, sa mga pagkaong lignginon ug 12 ka buok lignginon nga nagkadaiyang prutas nga taliwad-an sa lechon-baboy, mabulokon man ug banha ang atong pagsugat sa Bag-ong Tuig ug mahinangpon kitang mosugat niini nga puno sa paglaom nga kini maghatod na kanato og suwerte, apan ang ginapangandoy natong suwerte seguradong dili moabot kon magtanga lang kita sa atong gilingkoran ug padayong magdamgo.

Ipakita nato nga mahimo natong makab-ot ang gilatid nga pangandoy sa minaayong paagi bisan pa sa grabeng kalisdanan nga atong sagubangon sa mosunod nga 52 ka semana sa atong kinabuhi. Ugmaron nato ang kinatibuk-ang potensiyal sa abilidad nga gigasa sa Kahitas-an.

Ning tuig 2011, ang tanang posibilidad ug mga hagit magsugod na usab. Hinaot nga padayon kitang magtinguha sa pagkakabuhi nga himsog, malipayon, malamposon ug mag-ampo nga ipahilayo sa kadaotan ug katalagman.