NAGPANTALON SI LAPULAPU

Misuroy kos gilubngan sa mga damgo
Ni Crispin diin diyotay na ang mga pati nga naningaon
Sa gisabod nga paglaom, wa ko magdahom makita
Nga manaog sa gitungtongang semento si Lapulapu.

Ang pulo sa Mactan nga iyang giputong nahilis ug
Mitipon sa giugom nga hangin sa berano.

Miduol siyas managhigugmaay nga nanap-ong
Sa ilong samtang naghigda sa tsokolateng bermuda.

Giduslak niya ang kampilan sa dughan
Sa yuta taliwala sa duha nga nagdaghong misakay
Sa nangarol nga pako sa euphoria patighulog sa nirvana.

Mitalikod siyas mga apo nga pinutlan
Sa dila.

Giduol niya ang tindero nga nagngising mihanyag
Og ukay-ukayng pantalon.
Milingo-lingo siya apan iyang
Gidawat.

Gihubo niya ang bahag nga walay
Labalaba
Sa lima ka gatos ug kawaloag lima ka
Kuwaresma. Ug
Gisul-ob niya ang ukay-ukayng pantalon.

Unya, daw tinungogang tuba ni Laloy ang bulok
Sa nanghugot niyang nawong pagkakitang nanuasik
Ang katawa sa tinderong nagsud-ong kaniya
Nga naggaak-gaak sa paglakaw.

Gihubo niyag dali ug giuli
Sa tindero ang ukay-ukayng pantalon.

Gibalik niyag sul-ob ang bahag
Nga humot gihapon
Sa iyang pamatyag.



(This poem won First Honorable Mention in BATHALAD-Mindanao, 2006 and published in Sun.Star Weekend, August 2006.)