AKTA REPUBLIKA NO. 9504

Republika sa Pilipinas
Kongreso sa Pilipinas                   
Unang Regular nga Sesyon                   

H. No. 3971
S. No. 2293



AKTA REPUBLIKA NO. 9504


USA KA AKTA NGA NAG-USAB SA MGA SEKSIYON 22, 24, 34, 35, 51, UG 79 SA AKTA REPUBLIKA NO. 8424, SEGUN SA PAGKAUSAB, NGA NAILHAN USAB ISIP "NATIONAL INTERNAL REVENUE CODE OF 1997"


Kini maoy gimando sa Senado ug Balay Balaoranan sa Pilipinas sa hiniusang tigom sa Kongreso:


SEKSIYON 1: Ang Seksiyon 22 sa Akta Republika No. 8424, segun sa pagkausab, nga nailhan usab isip "National Internal Revenue Code of 1997", nga sa ingon niana gipalapdan ang pag-usab pinaagi sa pagdugang sa mosunod nga mga depinisyon sunod sa Subseksiyon (FF) nga mabasa ingon ning mga mosunod:

"SEC. 22. Mga Depinisyon. – Kon gamiton niining Titulo:

"(A) x x x.

"x x x.

"(FF) x x x.

"(GG) Ang terminong 'statutory minimum wage' kinahanglang magpasabot sa suholan nga gitakda sa Regional Tripartite Wage and Productivity Board, nga gibatbat sa Bureau of Labor and Employment Statistics (BLES) sa Departament of Labor and Employment (DOLE).

"(HH) Ang terminong 'minimum wage earner' kinahanglang magpasabot sa mamumuo sa pribadong sektor nga gibayran sa statutory minimum wage, o ngadto sa empleyado sa publikong sektor nga may kompensasyong kita nga dili mosobra sa statutory minimum wage sa sektor nga dili agrikultural diin siya napahiluna."


SEKSIYON 2. Ang Seksiyon 24(A) sa Akta Republika No. 8424, segun sa pagkausab, nga nailhan usab isip "National Internal Revenue Code of 1997", nga sa ingon niana dugang giusab nga mabasa ingon sa mosunod:

"SEC. 24. Income Tax Rates. –

"(A" Gidak-on sa Buhis sa Kita sa Indibidwal nga Lumulupyo ug Langyawng Indibidwal nga Nanimuyo sa Pilipinas. –

"(1) x x x:

"x x x; ug

"(c) Sa buhisanan nga kita nga gipasabot sa Seksiyon 31 ning Kodigo, gawas sa kita nga pahamtangan og buhis ubos sa Subsections (B), (C) ug (D) ning Seksiyon, nga nasubay sa matag tuig nga magbuhis gikan sa tanang tinubdan sulod sa Pilipinas sa usa ka langyawng indibidwal nga nanimuyo sa Pilipinas.

"(2) Bayranan nga Buhis sa Buhisanan nga Kita sa mga Indibidwal.
— Ang buhis kinahanglang kuwentahon sumala sa giestablisar nga bayranan sa mosunod nga eskedyul:

"Wala mosobra sa P10,000                        5%

"Sobra sa P10,000 apan wala mosobra sa P30,000    P500+10% sa misobra sa P10,000

"Sobra sa P30,000 apan wala mosobra sa P70,000            P2,500+15%
sa misobra sa P30,000

"Sobra sa P70,000 apan wala mosobra sa P140,000            P8,500+20%
sa misobra
sa P70,000

"Sobra sa P140,000 apan wala mosobra sa P250,000          P22,500+25% sa misobra sa P140,000

"Sobra sa P250,000 apan wala mosobra sa P500,000          P50,000+30% sa misobra sa P250,000

"Sobra sa P500,000    P125,000+32% sa misobra sa P500,000


"Alang sa minyo nga mga indibidwal, ang bana ug asawa, nasakop sa probisyon sa (Seksiyon 51(D) niini, kinahanglang mag-iya-iyag kompyut sa ilang indibidwal nga buluhisan base sa kinatibuk-an nilang buhisanan nga kita: Provided, Nga ang bisan unsa nga kita dili piho nga maangkon o matumbok nga eksklusibong kita o nadawat sa bisan kinsa nila, ang sama kinahanglang bahinon pareho tali nilang duha sa katuyoan nga mapiho ang ilang tagsa-tagsa ka buhisanan nga kita.

"Provided, Nga ang nanagdawat og minimum nga suweldo sumala sa gipasabot sa Seksiyon 22 (HH) ning Kodigo kinahanglang na-exempt sa pagbayad og buhis sa buhisanan nilang kita: Provided, pa gayod, Nga ang bayad sa holiday, bayad sa obertaym, night shift differential pay ug hazard pay nga nadawat sa nanagdawat og minimum nga suweldo kinahanglan usab nga dili apil sa pahamtangan og buhis.

"x x x".

SEKSIYON 3. Ang Seksiyon 34 (L) sa Akta Republika No. 8424, segun sa pagkausab, nga nailhan usab isip "National Internal Revenue Code of 1997", nga sa ingon niana giusab nga mabasa ingon sa mga mosunod:

"SEK. 34. Iban Gikan sa Kinatibuk-ang Kita – Gawas sa mga magbubuhis nga nanagdawat og suhol gikan sa personal nga serbisyo nga nahimo ubos sa relasyon nga tag-iya-empleyado diin ang pag-iban wala tugoti ubos ning maong Seksiyon gawas sa Subsection (M) niini, sa pagsumada sa buhisanang kita nga pahamtangan og buhis ubos sa mga Seksiyon 24(A); 25(A); 27(A), (B) ug (C); ug 28(A)(1), kinahanglang tugotan ang mosunod nga pag-iban gikan sa kinatibuk-ang kita:

"(A) Gasto. –

"x x x.

"(L) Optional Standard Deduction. – In lieu, sa gitugotan nga pag-iban ubos sa nahiuna nga mga Subsection, ang indibidwal pabayron og buhis ubos sa Seksiyon 24, gawas sa langyawng dili residente, mahimong mopili og standard deduction nga dili mosobra sa 40 porsento (40%) sa kinatibuk-an niyang halin o gross receipts, sa ingon pananglit nga kaso. Sa kaso sa korporasyon nga pabayron og buhis ubos sa mga Seksiyon 27 (A) ug 28 (A) (1), mahimong mopili og standard deduction sa kantidad nga dili mosobra sa 40 porsento (40%) sa kinatibuk-an niining kita nga gipasabot sa Seksiyon 32 ning Kodigo. Gawas kon ang magbubuhis gustong mopili sa optional standard deduction, siya ikonsiderar nga nakapahimulos sa iyang kaugalingon sa mga pag-iban nga gitugotan sa nahaunang Subsections. Kon ang maong pagpili gihimo, dili na gayod kini mausab sulod sa buhisanang tuig kanus-a gipahigayon ang pagbayad: Provided, Nga ang indibidwal nga may katungod ug pagdeklarar alang sa optional standard deduction dili na kinahanglang moduso pa sa iyang tax return o financial statement kon gikinahanglan man ubos ning Kodigo: Provided, pa gayod, Nga gawas kon ang Komisyoner mouyon, ang naasoyng indibidwal kinahanglang magbaton og talaan sa kinatibuk-an niyang halin o gross receipts, o ang naasoyng korporasyon kinahanglang magtipig og samang talaan nga may kalabotan sa kinatibuk-an niyang kita nga gipasabot sa Seksiyon 32 ning Kodigo sa panahon sa buhisanan nga tuig, kon kini gipangayo man sa kalagdaan nga gipahayag sa Sekretaryo sa Panalapi, sa rekomendasyon usab sa Komisyoner.

"(M) x x x.

"x x x."

SEKSIYON 4. Ang Seksiyon 35 (A) and (B) sa Akta Republika No. 8424, segun sa pagkausab, nga nailhan usab isip "National Internal Revenue Code of 1997", nga sa ingon niana giusab nga mabasa ingon ning mga mosunod:

"SEC. 35. Gahin nga Personal nga Eksemsiyon Alang sa Indibidwal nga Magbubuhis. –

"(A) Sa Katibuk-an. – Sa katuyoan nga mapiho ang buhis nga gipasabot sa Seksiyon 24 (A) ning Ulohan, kinahanglang tugotan nga dunay basic personal exemption nga mokantidad og Singkuwenta mil pesos (P50,000) alang sa matag indibidwal nga magbubuhis.

"Sa kaso sa mga minyo nga indibidwal diin usa lang kanila ang dunay sumadang kinatibuk-ang kita, ang maong kapikas lang ang kinahanglang tugotan nga makakuha og personal nga eksemsiyon.

"(B) Dugang Eksemsiyon Alang sa mga Dependent. – Kinahanglang tugotan nga dunay dugang eksemsiyon sa kantidad nga Baynte singko mil pesos (P25,000) alang sa matag usa ka dependent nga dili mosobra sa upat (4).

"Ang dugang eksemsiyon alang sa mga dependent, mahimong angkonon sa usa lang ka kapikas kon siya minyo.

"Sa kaso sa legal nga nagbulag nga magtiayon, ang dugang eksemsiyon mahimong maangkon lang sa kapikas nga dunay kustodiya sa anak o mga anak: Provided, Nga ang kinatibuk-ang kandidad sa dugang eksemsiyon nga mahimong angkonon nilang duha kinahanglang dili molabaw sa labing dako nga gitugot nga dugang eksemsiyon.

"Alang sa katuyoan ning Subsection, ang 'dependent' nagpasabot sa usa ka lehitimo, dili lehitimo o legal nga sinagop nga bata nga nanagsalig ug mipuyo uban sa magbubuhis kon ang maong dependent wala pa molapas sa 21 ang edad, wala pa maminyo ug walay trabaho o kon ang maong dependent, bisan og milapas na sa gitakda nga edad apan dili makasuporta sa kaugalingon tungod sa mental o pisikal nga depekto.

"x x x."

SEKSIYON 5. Ang Seksiyon 51 (A) (2) sa Akta Republika No. 8424, segun sa pagkausab, nga nailhan usab isip "National Internal Revenue Code of 1997", nga sa ingon niana dugang giusab nga mabasa ingon ning mosunod:

"SEC. 51. Individual Return. –

"(A) Mga Rekisito. –

"(1) Gawas sa gipasabot sa parapo (2) ning Subseksiyon, ang mosunod nga mga indibidwal gikinahanglang moduso og income tax return:

"(a) x x x;

"x x x.

"(2) Ang mosunod nga mga indibidwal wala na kinahanglanang moduso og income tax return:

"(a) x x x;

"(b) Usa ka indibidwal sa pagrespeto sa tinuod nga kinitaan, nga gipasabot sa Seksiyon 32 (A)(1), naggikan sa mga tinubdan sulod sa Pilipinas, ang bayronong buhis nga saktong giiban ubos sa probisyon sa Seksiyon 79 ning Kodigo: Provided, Nga ang indibidwal kasamtangang magdawatan og suhol gikan sa duha o sobra pang agalon sa bisan unsang higayon sa buhisanang tuig kinahanglang moduso og income tax return;

"( c ) x x x; ug

"(d) Ang usa ka nagdawatan lang og minimum nga suweldo nga gipasabot sa Seksiyon 22 (HH) ning Kodigo o ang indibidwal nga may eksemsiyon sa pagbayad og buhis pinasubay sa probisyon ning Kodigo ug ubang mga balaod, heneral o espesyal.

"x x x."

SEKSIYON 6. Ang Seksiyon 79 (A) sa Akta Republika No. 8424, segun sa pagkausab, nga nailhan usab isip "National Internal Revenue Code of 1997", nga sa ingon niana gipalapdan pag-usab nga mabasa ingon ning mga mosunod:

"SEK. 79. Buhis nga Makolekta sa Tinubdan. –

"(A) Rekisitos sa Paghawid. – Gawas sa kaso sa nanagdawat og minimum nga suweldo sumala sa gipasabot sa Seksiyon 22 (HH) ning Kodigo, ang matag employer nga nagpahigayon pagbayad og suholan o kita kinahanglang moiban ug mohawid sa buhis sa kita nga gideterminar pinasubay sa kalagdaan nga isugyot sa Kalihim sa Panalapi, sa rekomendasyon usab sa Komisyoner.

"x x x."

SEKSIYON 7. Separability Clause. – Kon ang bisan unsang probisyon ning maong Akta madeklarar nga dili balido o wala mahisubay sa Konstitusyon, ang ubang probisyon niini nga wala maapektohi kinahanglang magpadayon sa iyang kinatibuk-ang gahom ug epekto.

SEKSIYON 8. Repealing Clause. – Bisan unsa nga balaod, presidential decree o issuance, executive order, letter of instruction, administrative order, kalagdaan nga mahiuyon o mahisupak sa bisan unsang probisyon ning maong Akta, mausab o mabakwi tungod niani.

SEKSIYON 9. Kaepektibo: – Kining maong Akta kinahanglang moepekto kinse (15) ka adlaw human mapatik sa Official Gazette o sa labing menos duha (2) ka nasodnong mantalaan nga may langyab nga sirkulasyon.

Giaprobahan, Hunyo ___, 2008.