SIWAWER GARLIC PRODUCTS (RURAL IMPROVEMENT CLUB)

SIWAWER GARLIC PRODUCTS (RURAL IMPROVEMENT CLUB)
Garlic
Vintar, Ilocos Norte


Ang Ahos ug ang Kaasawahang Siwawer

Para sa kadaghanang tawo, ang ahos usa lang ka ahos. Apan para sa kababayen-an sa Vintar, Ilocos Norte, ang ahos maoy ilang dalan sa kinabuhi.

Ang gamayng lungsod sa Vintar maoy dapit diin makaplagan ang Siwawer Garlic Products Association (Rural Improvement Club), usa ka grupo sa kababayen-ang may 35-ka-membro, kasagaran mga asawa, nga nahilambigit sa pagproseso sa nagkadaiyang produkto sa ahos. Ang mga kinabuhi ning maong kababayen-an nangausab tungod kay imbes igahin ang panahon sa pagpakigtsismis sa isigkaingon, sila karon mingkita nag nanagingting salapi.

Ang garlic kun ahos maoy “Puting bulawan sa Ilocos Norte”, ug usa ka di mawaning lamas sa matag potaheng Pilipinhon.

Usa ka versatile nga panginahanglanon, ang ahos gikonsiderar nga maoy labing maayog abot nga tanom sa panahon sa ting-init sa Rehiyon 1, nagatala og 65-69 porsento sa tinuig nga nasodnong abot. Ang ahos usa ka maayong tinubdan sa calcium, phosphorus, ug potassium ug nailhan nga nagbaton og therapeutic and healing properties ubay sa iyang daghang kapuslanang medikal.

Matod ni Wilhelmina P. Castañeda sa Department of Agriculture-Regional Field Unit (DA-RFU 1), sa tanang matang sa ahos nga giprodyus sa tibuok kalibotan, “Ang ahos sa Ilocos maoy labing humot ug pungency. Bisan tuod og gagmayg gidak-on, ang lusok kon itandi sa ahos sa Taiwan, mas lamian ug labawng pungent.”

Apan ang problema sa gidak-on sa ahos sa Ilocos nasulbad dihang ang grupo ni Castañeda miintrodyus sa pag-aplay og gibberellic acid (GA3) sa ilang pagpananom. Ang GA3 usa ka hormone nga mopakusog sa pagtubo ug pagdebelop sa ahos.

Ang Bureau of Agricultural Research (BAR) nagsuportar sa komersiyalisasyon sa industriya sa ahos sa Rehiyon 1, aron pagdasig sa pagsagop sa binag-ong produksiyon ug teknolohiya sa pagproseso aron pagtabang nga mapalapdan ug madebelop ang merkado alang sa ahos ug mga produkto sa ahos. Tipik ning kalihokan sa komersiyalisasyon mao ang paghatag og pagbansay-bansay ngadto sa labing menos 150 ka mag-uuma og ahos kalabot sa binag-ong teknolohiya sa pagprodyus og ahos ug ingon man pagproseso sa ahos.

Ang bansay-bansay naglakip sa “Garlic Production Technology and Leadership Training”, nga gitambayayongan pagpahigayon uban sa CropKing, SAGREX Chemicals, ug ubang mga kompaniya sa kemikal ug kini gitambongan sa mga manananom og ahos gikan sa Pasuquin ug Vintar, Ilocos Norte.

Ang “Garlic Processing and Value-Adding” ug “Garlic Products Packaging and Labeling” gitambayayongan usab pagpahigayon uban sa Mariano Marcos State University (MMSU) ug sa Department of Science and Technology (DOST) nga samang gitambongan sa mga membro sa Rural Improvement Club ug 4-H Club.

Natukod niadtong 2007, ang Asosasyon nagdebelop og nagkadaiyang produkto sa pagkaon gikan sa ahos sama sa pickled garlic, garlic peanut adobo, ug garlic powder. Sumala sa ilang presidente, Luzviminda H. Tunac, ang pickled garlic maoy labing halinon ug ginabaligya sa tag-P50 kada botelya, ug uban sa panabang ni Castañeda, halos naperpekto na nila ang teknolohiya sa paghimo niini. Si Castañeda miasoy nga, “sa pagkakaron mingpokus mi sa packaging sa produkto alang sa mas maayong panagway niini.”

Sa mga buwan sa tingdas-ag, ang Asosasyon makaprodyus og 50 ka botelya sa pickled garlic sa usa ka semana. Panahon ning mga buwana, ang mga membro magtrabaho og lima ngadto sa walo ka oras sagad sa usa ka adlaw.

Sanglit ang Asosasyon linghod pa kaayo, di kalikayan ang mga sulirang motungha. Si Tunac nagkanayon nga “ang pundo maoy krusyal nga aspeto ug dili sila makahimo sa ilang full operation kon dili sila makabaton sa gikinahanglang mga makina ug ekipo sa pag-standardize sa ilang mga produkto. “Dili problema ang produksiyon sanglit naa man mi daghang membro nga molihok sa trabaho. Apan sa pagkakaron, ang tanang proseso pagahimoon pa sa mano-mano nga paagi,” dugang niya.

Pinasibo sa iyang bisyon alang sa Asosasyon, si Tunac miingon nga gikinahanglan nilang mokaplag og mga estratehiyang promosyonal aron pag-promote sa ilang mga produkto ngadto sa mas kusog nga buylo ug maghatod niini ngadto sa mga supermarket aron mapalapdan pa ang langyab sa ilang mga konsumedor.


Mga Tip

• Uban sa aplikasyon sa GA3, ang abot sa ahos misaka sa labing menos 56% nga miresulta sa 66% nga pagtaas sa limpiyong kita kada ektarya.