Unsaon nga Makakuhag Trabaho sa oDesk

Ang oDesk ang usa sa labing maayong balayan alang sa nagpangita og trabaho ug sa mga freelancer. Naay daghang bakanteng trabaho ning balayan ug ang paagi sa pagpamayad gisaligan sa mga employer ug sa mga kontraktor. Kon ikaw nagplano nga magsugod og virtual career, akong girekomendar ang oDesk.

Sa oDesk, dili ka lang magtukod og kahinguhag kuwarta, nagtukod ka usab sa imong birtuwal nga karera. Ang balayan magmentinar sa rekord sa miagi ug kasamtangang nakuha nga mga kontrata ug mahimo nimo kining magamit aron makakuhag malungtarong source of income. Sa higayon nga makakuha ka nang kontrata, ipakita ug ihatag ang tanan nimong mahimo sa imong abilidad tungod kay ang employer maghatag og feedback sa imong performance nga permanenteng marehistro sa imong rekord sa oDesk.

Kon dili ka motuo nga makapangaplay kag trabaho ug mokitag dolyar sa oDesk, ako ang pruyba.

Sa duha ka semana nakong pagpangaplay sa oDesk, nakapag kog trabaho nga ang himoon mao ra ang pag-set up og mga account sa Blogger, Wordpress, Twitter, Facebook, Squidoo, Hubpages, Tumblr, ug ang pagsulat og SEO-optimized nga mga artikulo. Nagsugod kini sa Marso 26, 2012.

Sa 32 oras nakong pagtrabaho sukad sa Marso 26 hangtod sa Abril 2, mikita kog $64 sa tag $2 kada oras. Ug kining kantidara ahong gi-withdraw niadtong Abril 11 aron ideposito diretso sa UnionBank EON Account. Nakibrahan kinig $.99 sa withdrawal service fee. Niini, akong nasuta ang usa ka semana nga suweldo sa pagpanarbaho sa oDesk makuha duha ka semana human masumada ang usa ka semanang kita. Matagamtam nimo ang bugti sa kahago ug pagsilibudlay diha sa internet. Sa sunod buwan mahimong makakubra na kog kada semana kay padayon pa man ang kontrata nga molanat og unom ka buwan o sobra pa, depende sa gikinahanglan sa employer.

Kon gusto kang magsugod nga mokitag dolyar gikan sa internet, sulayi ang oDesk. Sento porsento kining libre ug way mawala nimo. Masorpresa ka ra unya sa daghang tawo nga aktuwal nga mikitag dolyar sa maong balayan. Naay mga blogger, writer, web designer, translator, virtual assistant, uban. Silang tanan nakadiskobre nga ang home-based online jobs labi pang maayo kaysa magtrabaho sa pisikal nga opisina.

Sa mga wala pay kontrata, aniay pipila ka mahinungdanong giya aron makakuha kas una nimong kontrata sa oDesk:

Sutaa unsay imong abilidad. Sa dili ka pa magpadala sa imong resume ug cover letter sa potensiyal nga mga kliyente, sutaon nimo unsa ang imong area of expertise. Sa gihisgotan na nato sa unahan, naay daghang oportunitunidad sa pagpanarbaho sa oDesk. Pananglitan, kon hanas ka mogamit sa Photoshop ug CSS (Custom Style Sheet), mahimo nimong sulayan pag-aplay ang web designing. Kon may talento ka sa pagsulat, mahimo kang moaplay isip tigsuwat og mga artikulo nga ipatik sa mga balayan. Kon hanas ka mogamit sa Word ug Excel, mahimo kang moaplay isip data entry specialist. Ug daghan pang uban.

Seguroa nga duha kay panahon sa pagtrabaho onlayn. Gikinahanglan nga modesisyon ka kon gusto ba nimo ang full-time o part-time nga trabaho. Kon gusto nga kini himoong numero unong kahinguhaan og kita, maglatid kag regular nga eskedyul sa pagtrabaho nga konbenyente sa imong estilo sa kinabuhi. Sa laing bahin, kon kini himoon lang kahinguhaan og ekstra nga kita, maglatid ka usab kon pila ka oras ang igahin sa imong pagpangsaydlayn.

Mokuha sa oDesk readiness exam. Mokuha kag oDesk qualification test depende sa unsang matang sa trabaho nga gusto nimong aplayan. Kini nag-apil sa kalambigit nga mga pasulit nga magsukod sa imong kahibalo ug abilidad mahitungod sa espisipikong mga trabaho. Kon gusto kang mangaplay sa posisyon nga article writer, ang mga employer kasagaran nagpangita sa mga aplikante nga taas og score sa English Basic Skills (British o American version).

Yanohon ang pagpangitag trabaho. Ang oDesk naghatag og paagi aron mapasayon ang pagpangitag trabaho sa mga kontraktor. Duna kay opsiyon sa pagsuhid sa mga trabaho base sa mga kategoriya o base sa abilidad. Mahimo usab nimong palawman ang pagpangita pinaagi sa pagpangita sa tipo sa mga trabaho sama sa inoras ug pakyaw, lanat sa pagtrabaho (kubos sa usa ka buwan o sobra pa), part-time ba o full-time, ang feedback sa employer, ubp.

Pangandam alang sa imoong interbiyo. Kasagaran ang interbiyo ipahigayon pinaagi sa email o online chat. Ang employer magtakda sa petsa ug oras aron mainterbiyo ka pinaagi sa Skype ug Yahoo Messenger. Sa panahon sa interbiyo, magpakatinuod ka sa imong kaugalingon kon unsa ang imong ikatanyag nga abilidad ngadto sa employer nga makatabang usab sa ilang gimbuhaton, negosyo, ubp. Kini ang hustong higayon nga gamiton nimo ang imong abilidad sa negosasyon.

Ayaw pag-angka. Isalikway ang pag-angka kon dili man makakuhag trabaho sa una, sa ikabayente, o sobra pa sa imong aplikasyon. Hunahunaa, ang matag kontraktor dunay kahigayonan sa pagpadala og 20 ka aplikasyon sa trabaho matag semana. Gamita kini sa hustong paagi. Ayaw pagpanalaw kon isalikway ka sa mga employer o i-reject ang imong aplikasyon. Rebyoha hinuon ang imong profile. I-rewrite ang imong resume ug cover letter. I-update ang imong portfolio. Ug kon gikinahanglan, mokohag usab sa mga pasulit aron makakuhag taas nga score.

Hinaot nga kining gamayng giya makahatag og paglaom niadtong mga nagpangita pag trabaho ug sa nagpangitag sadlayn. Kay daghag oportunidad sa internet nga mokitag kuwarta basta dili lang maabusaran.