Pagpanarbaho nga Mokitag Dolyar Apan Dili Molangyaw sa Laing Nasod

KON gusto kang mokita og dolyar, managbaho kas laing nasod. Mao niy pagtuo nako sa una. Apan karon, nausab na. Mahimo diay gihapong mokitag dolyar nga dili na mag-overseas Filipino worker (OFW). Bisag naa ras ba’y o sa mga internet shop, mahimo gihapong mag-OFW ug mokitag dolyar. Kini ang gitawag karon og online Filipino worker.  Ug kana dili imposible sa panabang sa gahom sa internet.

Daghang kabataan karon, bisan gani kadtong nag-eskuyla sa kolehiyo o bag-ong gradwado nga wala pa makasulod og trabaho, nalinga na sa pagpangitag trabaho onlayn. Kay tiaw ba nga mokita man diayg dolyar.

Kining freelance market place karon ang ginaduaw sa kabataang Pilipino bisan gani sa mga hamtong o mga ginang sa panimalay nga gustong dunay kahinguhaan nga sideline. Labing popular niini ang Guru.com, Elance.com, LiveWork.com, Freelancer.ph ug oDesk.com. Sa lima, ang oDesk.com maoy pinalabi sa kadaghanang OFW.

Ang oDesk matawag nga usa ka online staffing marketplace ug management platform nga magtagana og sayon nga paagi sa paghayr, pagdumala ug pagbayad sa mga indibidwal nga gustong motrabaho bisan diin mang dapit sa kalibotan.

Unsay mga Trabaho nga Naghulat sa oDesk

Sa oDesk, daghang oportunidad nga makatrabaho ang multi-talented nga Pilipino. Pipila sa mga trabaho nga mahimong kaaplayan ang:

·         Web Development sama sa web designing, web programming, website project management

·         Software Development sama sa desktop applications, game development, scripts & utilities, software plugins, mobile apps

·         Writing & Translation sama sa technical writing, website content writing, blog and article writing, copywriting, translation, creative writing

·         Administrative Support sama sa data entry, personal assistant, web research, email response handling, transcription.

·         Design & Multimedia sama sa graphic designing, logo designing, illutration, print design, 3D Modeling & CAD, audio production, video production, voice talent, animation

·         Customer Service sama sa customer service & support, technical support, phone support, order processing

·         Sales & Marketing sama sa advertising, email marketing, SEO-search engine optimization, SEM – Search engine marketing, SMM-social media marketing, public relations, market research & survey

·         Business Services sama sa accounting, bookkeeping, payroll, financial services & planning, legal, business consulting

Pila May Madawat nga Suweldo

Sa oDesk, ikaw ang magbuot kon pilay gustong ipabayad sa imong pagtrabaho. Mahimong pakyaw o inoras. Apan magdepende sab kini sa abilidad nga imong nahuptan kun kini ba ang pinangita sa mga employer kasagaran gikan sa Amerika, Canada, Australia, Britanya, India ug New Zealand, sa paghingalan og pipila.

And suweldo magdepende sa matang sa trabaho, sa lebel sa kahibalo ug reputasyon isip kontraktor sa oDesk. And mga bag-ong kontraktor dili dayon makapaningil og taas sa ilang trabaho. Mas ubos ang ilang pagpaningil sa ilang serbisyo hangtod nga makakuhag kontrata ug mailado ang maayong reputasyon isip online worker. Kon duna nay rekord sa paghatag og serbisyo sa oDesk ug maayong feedback sa employer, sayon na lang ang pagpataas og presyo ug dali na sab makakuha og trabaho.

Mahimo mag-full-time o part-time sa oDesk. Ug ang nakaayo niini kay hawid nimo ang oras. Ikaw ang magbuot kanus-a ka motrabaho ug pila ka oras ang trabahoon nga dili sad makalapas sa gisitar sa kliyente. Apan mahinungdann sad nga makahatag og maayong resulta sa gisangon nga trabaho. Dunay nakatrabahog usa ka semana, usa ka buwan, unom ka buwan, usa ka tuig ug ang uban ming-abot pag tulo ka tuig o sobra pa. Ug kini sa lang ka kliyente.

Kasagaran sa naghayr og trabaho sa oDesk mga manedyer ug gagmayng kompaniya nga nagpangitag kontraktor sa bisan unsang mga trabahoon nga mahimo nilang i-outsource sa mga Pilipino nga nailhan nilang maayong motrabaho bisag gamayg suweldo.

Unsaon nga Makakuhag Trabaho

Magsugod ka sa yano sahi sa tradisyonal nga paagi sa pagpangaplay og trabaho. Una, mag-andam sa profile ug ibutang ang  kaagi sa pagpanarbaho ug nahuptan nga abilidad. Mokuhag pasulit sa online skills tests aron masuta ang lebel sa abilidad, ug mag-upload sa bisan unsang kalambigit nga mga sampol sa portfolio. Buhaton ang tanan aron maseguro nga makita ug makatagad sa mga kliyente ang imong aplikasyon. Unya, mahimo ka nang magsugod sa pagpangaplay og trabaho. Gitambag sa mga beterano nga magsugod sa ginagmayng  trabaho aron makamugna og maayong mga feedback hangtod nga may igo ka nang kasinatian nga magamit pagpangaplay sa dinagko nga mga trabaho.

Sahi sa tradisyonal nga pagpangaplay og trabaho, ang unang trabaho maoy lisod. Mogugol kinig daghang oras ug paningkamot nga makatukod og maayong profile ug makakuha og unang trabaho. Niini, gitambag sa oDesk nga mokuha og pasulit sa ilang libreng online skills test aron motaas ang kuta sa aplikasyon sa mga trabaho nga gianunsiyo diha sa ilang balayan. Sa kakugi sa pagpangaplay inubanan sa taas nga lebel sa abilidad, taas ray usa ka semana, makatrabaho na ka.

Sa imong pagpangaplay, mahimo sab nimong sutaon ang kliyente nga nagpaanunsiyo sa gusto nimong aplayan nga trabaho. Kon kini maayo bag feedback sama sa kaagi sa pagpamayad niini sa nahuman nang gianunsiyo nga mga trabaho.

Pila ka Trabaho ang Mahimong Aplayan

Libre kanunay ang pag-aplay og trabaho. Ugaling dunay limit sa mahimong aplayan nga trabaho ang bag-ong kontraktor. Ang bag-ong kontraktor nga wala pay feedback ug wala pay napasaran nga skills tests, mahimo lang makaaplay og duha ngadto sa lima ka trabaho sa usa ka higayon.  Ang kontraktor nga nakakuha nag upat o sobra pa nga pasulit o dunay feedback rating nga 4.0 o taas pa, mahimo nang makaaplay og 20 ka trabaho sa usa ka higayon.

Unsay Paagi sa Pagkuha sa Bayad sa Serbisyo

Mahimo nimong makuha ang bayad sa imong pagtrabaho pinaagi sa MoneyBookers, wire transfer nga maoy pinalabi sa kadaghanang kontraktor sama sa Payoneer ug Debit MasterCard. Apan mahimo sab nga ideposito diretso sa imong bank account kun duna man.

Higala, kon karon nagpangita ka pag trabaho, sulayi ang oDesk (www.odesk.com). Basin diayg makakita     ka rag haom nga trabaho nga sibo sa imong talento ug abilidad.