“Now, You Know!” – Manny Pacquiao

DAGHAN ang dili motuo nga si Emmanuel "Manny" Dapidran Pacquiao usa ka ekstraordinaryong boksidor nga Pilipino nga mitumaw ning atong panahon. Apan sa ilang nakita niadtong miaging Domingo, Mayo 3, 2009 (Sabado, Mayo 2 sa Las Vegas, Nevada) diin gimalmal og maayo ni Pac Man si Ricky "The Hitman" Hatton sulod lang sa 5 minutos ug 59 segundos, nakapanglingo-lingo sila. Tingali nasayod na sila.

Kompleto na karon ang ebolusyon ni Manny gikan sa pagka brawler ngadto sa usa ka mangtas nga manggugubat sa kuwadradong lona. Bisan sa iyang kamubo tandi sa iyang kaparang, usa siya ka kompletong maggugubat. Apan ang nakalahi kaniya karon sa uban kay ang mga suntok sa duha niya ka kamot parehong nagdala og bomba.

Hinuon, ang mga obserber sa boksing nagtuo nga pildehon gyod ni Pac Man ang hambogerong si Ricky Hatton. Apan ang wala nila maseguro nga mahimo kining moabot pinaagi sa usa ka makusog nga suntok, ang left hook, usa sa iyang hinagiban nga gikahadlokan sa daghan niyang kaparang, ug matapos ang sambunot sulod lang sa duha ka round.

Bisan sa kamubo sa maong panagsangka sa duha ka gladyador gikan sa sidlakan ug kasadpan, gipakita na usab ni Manny kon unsa siya kapaspas manuntok, unsa katayming ang iyang mga suntok, unsa kamagnipiko ang lihok sa iyang mga tiil, unsa kahigpit ang iyang depensa ug unsa kakusog ang iyang opensa nga iya nang gipakita batok nila ni David "Dangerous" Diaz ug Oscar "The Golden Boy" De La Hoya nga ang mga nawong iyang gipangmek-apan sa nagpungasing mga kumo ug giparetiro sa pamoksing.

Sa maong sambunot, wala magpulos ang hugawng dinuwaan ni Hatton. Wala niini mahingpit paggamit ang naawat nga mga teknik sa mixed martial arts sama sa pagtulod, paglayog ug pagpanghawid nga maoy kabahin sa iyang mga armas. Nawarningan ang tawo ni Kenny Bayless nga mosubay sa estandard sa hinlo nga pamoksing nga gipakita sa Pilipinong hari karon sa pound for pound sa tibuok kalibotan.

Sa unang round pa lang, wala nay gikatubag si Hatton sa right hook ni Pacquiao nga nakaingon sa duha ka higayon nga pagkatumba niini ug mihalok sa lona. Hangtod nga gibuhian ni Pac Man ang left hook nga nakapawong sa kahayag sa Briton bisan wala pa moligdas sa lona.

Ang iyang left hook ikatandi sa naghaguros nga dyip nga mibangga sa nawong sa usa ka tawo nga milabang sa kalsada nga walay lingi-lingi, nga nakaguba sa mga paglaom, damgo, ug nagpahiamgo nga moretiro sa pamoksing.

Si Ricky Hatton ang usa sa mga lig-ong boksidor sa kalibotan, usa ka kampeyon nga nagpakita sa iyang abilidad sa pamoksing sa sobra sa usa dekada. Ug ang 140 libras maoy iyang natural nga timbang. Busa, maingon nga siya lig-on ug dakog kompiyansa sa kaugalingon nga magmadaogon. Apan niadtong gabhiona, nahisama siya sa usa ka nipis ug baratohong botelya nga nabuak sa iyang pagkahagba sa lona.

Ang pangangkon ni Bob Arum, promoter ni Manny ug tag-iya sa Top Rank, nga ang Pambansang Kamao nagasubay na sa dalan sa kabantog nga matawag og "the greatest pound for pound fighter of all time" gisuportahan sa estadistika nga natala sa kompyuter diin nagpakita nga ang precision power punching ni Manny gidala gihapon niya bisan sa dibisyon nga bug-at ang timbang.

Sa estadistika nga natala sa CompuBox, ang mga numero nagpakita kon giunsa ni Pacquiao pagdala ang away batok kang Hatton. Sa 127 ka suntok nga iyang gibuhian, 73 (57 porsento) niini ang miigo sa target tandi sa kaparang nga sa 78 ka suntok, 18 (23 porsento) ra ang mikonektar sa target. Ug ang nakaayo kay sa 105 power punches nga iyang gipahagiyos, 65 (62 porsento) niini ang mitama tandi sa kontra nga sa 56, 16 ra (29 porsento) ang nakapainit sa iyang dunggan.

Si Freddie Roach nga tigbansay ni Manny nahingangha usab sa gipakitang pakig-away ni Manny karon sa kuwadradong lona. Nakaingon ang kanhi boksidor nga si Pac Man na ang labing maayong boksidor sa kalibotan. Anaa siya karon sa taluktok sa iyang dula sa pamoksing. Si bisan kinsang boksidor nga iparang kaniya, mahimong pildehon.

Gipakita ni Manny Pacquiao (49-3-2, 37 KO) nga sa iyang pagkulata kang Hatton (45-2, 32 KO) naprobahan nga ang labing epektibo niyang timbang sa pagpamoksing sa pagkakaron mao ang 140 libras. Ug sa gipakita niyang pagpahalok, pagpakamang ug pagpahigda kang Ricky Hatton sa lona, gisemento niya ang kabantog nga matawag nga #1 Pound for Pound sa mga boksidor sa tibuok kalibotan karon. Maingon nga siya na karon ang gukdonon sa mga boksidor nga gustong mahimong popular sa pamoksing ug makapahat sa minilyong dolyares nga kitaon sa pay-per-view.

Si Pacquiao mahimong mao na ang labing maayong boksidor sukad kang Sugar Ray Leonard. Hinuon, dunay mga maayong laking boksidor nga mingsunod kang Leonard sama nila ni Pernell Whitaker, Roy Jones Jr., Julio Cesar Chavez, Evander Holyfield ug daghan pang uban. Apan wala sila magbaton og kombinasyon sa eksplosibong kaabtik ug kakusog manuntok sama sa usa ka Manny Pacquiao batok sa dekalibreng kaparang sulod sa hataas nga panahon. Sukad nga gikuha niyang tigbansay si Freddie Roach niadtong 2001, nagkamada na si Pacquiao og rekord nga 17-1-2 (win-loss-draw) ug 14 niini ang knockout batok sa labing maayong boksidor sa kalibotan.

Ug karon nga nakuha ni Manny ang ikalimang world title sa nagkalainlaing weight division (flyweight, super bantamweight, super featherweight, lightweight, light welterweight), mao na usay iyang pangandoy nga masulat sa kasaysayan pinaagi sa pag-angkon og ikaunom nga world title nga mahimong matigayon batok kanila ni Miguel Cotto, Shane Mosley ug bisan sa kontrapelo niyang si Juan Manuel Marquez o Floyd Mayweather Jr.

Sa sensasyonal nga kadaogan ni Manny Pacquiao batok kang Oscar De La Hoya ug Ricky Hatton, duha sa labing maayo ug labing popular nga boksidor sa ilang henerasyon, naangkon ni Manny ang way sukod nga imortalidad sa boksing. Busa dili kalikayan nga misamot kapopular ang esport nga boksing sa Pilipinas ning minglabayng mga tuig. Daghang nalamat sa pagtumaw sa usa ka Manny Pacquiao nga misaka sa kabantog pinaagi sa padayong paghagit sa iyang kaugalingon ug kanunayng pagdaog diha sa kuwadradong lona nga naghatag og kalipay ug tulay sa panaghiusa.

Sa matag saka ni Pacquiao sa kuwadradong lona, ang Pilipinas ingon sa nagdeklarar og holiday. Muslim, Kristiyano, etnikong Tsino o may dugo mang Espanyol, halos ang tanan naghinam-hinam nga makita ang Pambansang Kamao nga makig-away sulod sa kuwadradong lona. Kini, tungod kay ang usa ka Manny Pacquiao dunay karisma nga mohinol sa kasingkasing sa nagsubo, moagbay sa mga kabos, magpahiamgo sa mga ilado ug sapian nga magmapaubsanon bisan sa naabot nilang bantang sa kinabuhi.

Unsay sekreto ni Manny Pacquiao nganong siya nagmalamposon sa kinabuhi ilabi na sa pamoksing? Ang iyang sekreto wala malilong sa kadaghanan. Kini ang iyang pagtuo sa Labawng Makagagahom nga maoy naghatag kaniyag kusog, ang iyang pagtuo nga siya gigasahan og talento, ug ang iyang pag-ugmad sa talento nga gigasa kaniya sa Kahitas-an.

Now, you know.