Showcase for a family: 150 metro kuwadrado mahimong kaanihag utanon nga igo sa panimalay

ALANG sa mas himsog nga panimuyo, pagtanom ug kaon og daghang utanon. Ang usa ka pamilya mahimong makaprodyus sa tanan nilang gikinahanglan nga utanon sa 150 metro kuwadrado nga luna, nga ang sobrang maani mahimong ikabaligya alang sa dugang kita sa pamilya.

Kini ang gipakita ni Terre Virna Tanquezon sa ika-25 nga pagsaulog sa anibersaryo sa East-West Seed Company sa miaging mga bulan nga gipahigayon sa punoang buhatan niini sa San Rafael, Bulacan. Gradwado sa agrikultura sa Leyte State University sa Baybay, Leyte, nananom siya og nagkadaiyang utanon sa demonstration farm aron pagpamatuod sa iyang punto nga mahimo siyang makapatubo og nagkadaiyang utanon bisan sa limitadong espasyo. Iyang gipakita nga ang usa ka pamilya mahimong makapananom og mga utanon alang sa nagkadaiyang potahe sa samang higayon.

Pananglitan, dili ka angay nga magluto og pinakbet sa tanang panahon. Kay makapananom kag berdeng utanon nga magamit sa pag-salad sa samang panahon. Ug bisan sa mga utanon alang sa chopsuey ug ubang sud-anon.

Usa ka teknik niini mao ang pagbaton og tabunok nga yuta alang sa pagpananom og mga utanon. Kon ang yuta ku’non, mahimo kining mapausbaw pinaagi sa pagdugang og garden soil, compost ug ugang mga biya sa hayop, carbonized rice hull kun pakpak sa humay ug ubang mga materyal nga mahimong makapatabunok sa yuta.

Laing teknik mao ang paggamit og dekalidad nga mga binhi sama sa taas-og-bili nga mga haybrid nga dili lang mas produktibo, apan labing makasugakod batok sa mga peste ug sakit. Mahimo usab kining itanom sa bisan unsang panahon sa tuig aron ang produksiyon mahimong magpadayon. Ang nakaayo niini kay ang East-West Seed nakaugmad og daghang haybrid nga mga binhi alang sa mga nanaggarden apil na ang dinagko ug komersiyal nga mga prodyuser.

Alang sa pinakbet, girekomendar ni Terre nga mananom og paliya, talong, pepper (bell ug finger types), okra, batong, kamatis ug patola o sikwa. Alang sa sinigang, si Terre mirekomendar sa upland kangkong, radish, pechay, okra ug finger pepper. Kon alang usab sa salad mix, mahimong magpatubo og sweet pepper, letsugas, kamatis, cauliflower ug cucumber.

Bisan ang gamay nga luna mahimong makaanig daghang utanon kon migamit sa haom nga mga matang. Pananglitan, mga tunga lang sa dosena ang itanom sa finger pepper Django. Tungod kay kini himungahon nga haybrid. Ang matang sa mga talong nga naugmad sa kompaniya himungahon usab mao nga bastante na kaayo ang gamayng luna. Kini nag-apil sa Casino, sa Domino ug Morena nga labing bag-o nga ipagawas nga haybrid. Kini makasugakod sa mga sakit ug matanom sa daghang dapit sa kapupud-an. Mahimo usab kining matanom sa halos tanang dapit sa Pilipinas sa bisan unsang panahon sa tuig.

Usa sa bag-ong paliya nga gipagawas sa kompaniya alang sa nanaggarden sa kilid sa panimalay ug dagkong umahan, mao ang Bonito. Moprodyus kinig bunga nga mga upat ka pulgada ang gitas-on nga kinaham alang sa pagluto og pinakbet.

Ang upland kangkong angay nga dili mawala sa garden sa kilid sa panimalay. Dili lang
kini alang sa sinabaw, mahimo usab kining lutoon isip adobong tangkong o gininamosan nga tangkong sahi sa usa ka popular nga food chain nga nagdalit niini ngadto sa ilang mga kostumer. Ang nakanindot sa upland kangkong kay mahimo kining anihon sa mubong panahon gikan sa pagtanom, mga tulo ngadto sa upat ka semana gikan sa pagsabod sa liso. Mahimong magtanom og sunod-sunod aron ang berdeg dahon nga tangkong mahimong mapalit sa tibuok tuig.

Ang kamatis angay usab nga matanom sa garden sa panimalay. Dunay mga matang nga mahimo nang matanom bisan sa ting-ulan. Kini nag-apil sa Marimar ug Diamante. Ang usa mahimo usab nga magpatubo og salad tomato kon gusto man niini. Ang maayong matang nga patuboon mao ang haybrid nga Maxima.

Ang bagonon nga mga utanon mahimong patuboon gamit ang pakatayan. Kini nag-apil sa batong, paliya, kalabasa, cucumber, patola ug upo.

Ang usa ka laing tanom nga mahimong idugang sa mga utanon mao ang Sinta papaya. Kini magpasubol og bunga nga mahimong maani inig-abot sa ika-8 nga buwan gikan sa pagtanom. Ang berde nga mga prutas mahimo usab nga isahog sa linutong kinaham nga tinola. Ang uban mahimo usab nga buhatong pickles o atsara.

Karon nakita mo na. Mahimo kang makaprodyus sa komun nga mga utanon nga gikinahanglan sa imong pamilya bisan sa limitadong espasyo. Nganong dili nimo sulayan?

Sinulat ni Zac B. Sarian nga gihubad sa Binisaya.