Ikapitong Langit sa Dugoong Esports

LAING perpektong pasundayag na usab ang gipakita ni Manny Pacquiao didto sa teyatro sa Las Vegas nga nakatagad sa minilyon ka mata lukop kalibotan. Kon ang mga nakatan-aw moingon nga kadto usa ka arte, matawag nato nga si Manny usa ka artista nga ang abilidad dili hitupngan.

Bisan sa daghang suliran nga atong giatubang, nagpasalamat ta sa usa ka Manny Pacquiao kay makalakaw kitang magbatyag nga mitaas ang bantang sa atong pagka tawo unsang hut-ong man sa katilingban nahitalay, arangan man o adunahan o kabos ug hinikalimtan. Gani, bisan ang boxing fans sa tibuok kalibotan, nakabatyag usab og gamayng garbo kay nakita nila ang gamayng tawo apan dakog gikatabang sa mga Pilipino.

Sa gipakita niyang abilidad sa kuwadradong luna, gipamatud-an niya ang iyang pagka hari sa gipiling karera. Nahingangha lagi ang tibuok kalibotan sa brutal niyang eksekusyon kang Miguel Cotto, ang kaparang nga World Boxing Organization Welterweight Champion, niadtong Nobiyembre 14 (Nobiyembre 15 sa buntag dinhi sa Pilipinas) diin gipahilam-os niyag nagpungasing solidong mga kumo hangtod nga giabot nag kaluoy si Kenny Bayless ug gihunong sa reperi ang sambunot, 55 segundos gikan sa pagsugod sa kataposang hugna.

Sa tapad, si Cotto ang ingon sa dako ug kusgan nga boksidor tungod kay usa siya ka natural nga welterweight. Apan panahon sa sinukliay sa kinumo, naingon na siya sa usa ka ordinaryong challenger. Ang away labihang pabora sa atong pinanggang boksidor diin ang Pambansang Kamao nagbuhig mga suntok sa nagkadaiyang anggulo nga nakalipong sa boksidor nga taga Puerto Rico.

Human sa away, naligo si Cotto sa kaugalingon niyang dugo nga miagas gikan sa mga samad sa iyang nawong. Ug giangkon ni Cotto nga si Pacquiao maoy lig-ong manggugubat nga iyang gikasakbang.

Ang bag-ong pagpasundayag ni Pacquiao sa pangamot nagbanhaw sa debate kon asa na siya mahimutang karon sa natad sa pamoksing. Ang mga kolumnista sa boksing mingpili kaniya nga greatest fighter sa iyang henerasyon. Apan alang sa iyang promoter nga si Bob Arum, si Pacquiao ang greatest fighter nga iyang nakita. Si Arum nga nahimong promoter sa mga away nila ni Muhammad Ali, Marvin Hagler ug Sugar Ray Leonard, miingon nga si Pacquiao maoy Tiger Woods sa boksing.

Dili ikalimod nga nakakuhag dakong luna si Pacquiao sa dugoong esport nga boksing. Dili lang siya usa ka bantogan nga manggugubat nga misaka sa kuwadradong lona. Usa usab siya sa labing maabtik, kusgan ug may kaisog makig-away sa dagko nga mga kaparang.

Samtang daghan ang mingsupak nga dili siya ang labing bantogan, ang iyang nakab-ot nga pito ka titulo sa pito ka klase sa timbang nahitala na sa kasaysayan sa boksing. Ekstraordinaryo ang iyang kalamposan sulod sa kuwadradong lona. Lisod hitupngan. Kon hitupngan man, mag-ihap pa kitag daghang mga tuig.

Taas na ang naabot ni Manny Pacquiao sa natad sa pamoksing ug maingon nga nagdangadanga na siya sa imortalidad ning dugoong paugnat sa kusog. Ug kay batan-on pa, daghan pa siyag makab-ot nga makadugang pagpalig-on sa usa ka lahi nga legasiya sa kasaysayan sa boksing.

Karon nga nakuha niya ang ikapitong titulo sa kampeyonato sa ikapito nga dibisyon, gikonsiderar na siya nga best pound for pound fighter sa boksing circa 2000-2009. Nahitalay na siya sa bantogang mga boksider sa kanhiay sama nila ni Muhammad Ali ug Sugar Ray Robinson. Gani karon, daghan na ang nanagtuo nga makuha niya ang dungog nga “Fighter Of The Decade (2000-2009). Apan sa akong tan-aw, duna pay usa ka bukid nga angay niyang tungason. Ug kini ang pagpakigsakbang kang Floyd Mayweather Jr. sa sunod tuig nga maoy gipangandoy sa daghang mahiligon sa boksing.

Kon magpadayon ang pagpakita ni Manny sa iyang abilidad sa pamoksing ug magpadayon ang iyang pagpanaog sa dekalidad usab nga boksider sama sa higpit niyang karibal karon nga si Floyd Mayweather Jr., malantaw nato nga siya na gyod ang matawag nga best pound for pound boxer ug mahimo na siyang ituboy nga G.O.A.T. – kun Greatest Of All Time sa natad sa boksing.

Sa hataas nga panahon human nga mobiya si Manny sa pamoksing, mahinumdoman gihapon siya sa iyang gihimo alang sa katawhang Pilipinhon. Usa siya ka ordinaryong Pilipino sama kanato apan nagtanom siyag inspirasyon. Gipakita niya ang ehemplo nga kita usab mahimong makaangkon og kalamposan alang sa atong kaugalingon. Usa siya ka buhing testamento sa usa ka kabos nga Pilipino nga naningkamot mabuntog ang kawad-on ug maangkon ang kalamposan bisan pa man magpatulo og daghang dugo.