May Pasko Taliwala sa Kalamidad ug Kawad-on

KON duna may matawag nga Ultimate Survivor sa kinabuhi, nag-una kitang mga Pilipino sa talaan. Ngano? Usa ka lig-ong rasa kitang mga Pilipino. Motuo ka ba niini? Ako motuo ko.

Sa tanang panahon ato kining napamatud-an. Andam kitang mosungasong sa mga kalamidad nga moabot sa atong kinabuhi, sa kawad-on nga buot moguba sa atong mga kaugmaon, sa kagutom nga buot mokitkit sa atong mga tinai, sa kaahaw sa kaalam nga buot motak-op sa daghang oportunidad sa kinabuhi, uban pa ug uban pa.

Ang kalamidad ug kawad-on sama sa usa ka magtiayon nga dili gustong magbuwag sa pagpanghulga sa matag adlaw natong pagpakabuhi. Pipila na ba ka linog ang miguba sa daghang kabalayan sa kapupud-an, mga bagyo, baha, lunop nga wala lang magdulot og kadaot sa atong panimalay, kabtangan, pananom ug hayopan ug mingkalas og kinabuhi sukad nga kita nakahimatngon? Dili na maihap sa atong mga tudlo. Apan anaa nagpabilin kitang nagbarog. Nagsubo man kita karon apan ugma modalit na kitag pahiyom. Kataw-an ang mga pagsulay. Dili magpabuntog. Nagkadugang ang atong kalig-on. Nagkadako ang atong pagsalig sa Makagagahom.

Sa ming-aging mga bulan, mingkusukuso sa kapupud-an ang daghang bagyo nga nagmugna og baha ug nagdulot og perdisyon sa daghan natong kaigsoonan ilabi na sa mga kabos. Hingpit nga naapektohan silang kaigsoonan nga halos dili na makapatukod og laing balay, silang mga kabos nga dili gani makaabot pagpalit og kaldero, silang mga kabos nga ang edukasyon sa mga anak nabalda sa paglalin ngadto sa ubang dapit aron didto magsugod og bag-ong kinabuhi sa gamay nga badyet. Apan bisan pa sa kalamidad ug kawad-on nga nasinati, magsaulog gihapon sila karon sa Pasko.

Malaomon silang hingpit nga makasaulog ning maong okasyon. Bisan pa sa gamayng badyet sa pagkaon, malipayon ang pamilya nga magsalo-salo sa pagpangaon.

Magpasalamat sa Makagagahom nga anaa pa sila nagpabiling buhi. Ug malaomon nga sa mosunod pang mga adlaw maangkon na ang kabulahanan sa kinabuhi. Malaomon sa masanag nga kaugmaon.

Ingon niini kitang mga Pilipino, may Pasko taliwala sa nahiagoman natong kalamidad ug kawad-on.